अञ्जीर

अञ्जीर Ficus carica
अञ्जीरके पत्ता आउ फल
संरक्षण स्थिति
सङ्कटमुक्त जाति  (IUCN 3.1)
वैज्ञानिक वर्गीकरण
जगत:	पादप

अञ्जीर (वानस्पतिक नाम: "फ़िकस कैरिका", प्रजाति: फ़िकस, जाति: कैरिका, कुल: मोरेसी) एगो गाछके फल है जे पकला पर गिर जा है । पकल फल खाल जा है । एकरा सुखाके सूखा मेवाके रूपमे बेचल जा है । सुखल अञ्जीरके टुकड़ा-टुकड़ा करके या पीसके दूध आउ चीनीके साथे खाएल जा है । एकर जैमके मुरब्बो बनावल जा है ।

सुखल अञ्जीरमे चीनीके मात्रा लगभग ६२ प्रतिशत आउ ताजा पकल फलमे २२ प्रतिशत होव है । एहिमे कैल्सियम आउ विटामिन 'ए' आउ 'बि' ढेर मात्रामे पाएल जा है । मानल जा है कि अञ्जीर खैलासे कब्जियत दूर होब है । ई हड्डियोके बरियार कर है । एक अध्ययनके अनुसार अञ्जीरमे बोरोन नामके एगो सूक्ष्म पोषकतत्व पावल जा है । बोरोन कैल्शियम के सोखेमे आउ एकरा हड्डी तक पहुँचावेमे मदत कर है ।

अञ्जीर भूमध्यसागरीय क्षेत्र आउ दक्षिण-पश्चिम एशियाई मूलके एगो पर्णपाती झाड़ी वा छोटा गाछ है जे पाकिस्तानसे यूनान तक पाबल जा है । एकर लम्बाई ३-१० फुट तक हो सक है । अञ्जीर दुनियाके सबसे पुरान फल सबमे से एक है । ई फल रसीला आउ गूदावाला होब है । एकर रङ्ग हल्का पीयर, गहरा सुनहरा या गहरा बैङ्गनी हो सक है ।

अञ्जीर अपन सुन्दर रूप आउ स्वादला प्रसिद्ध है । ई एकगो स्वादिष्ट, स्वास्थ्यवर्धक आउ बहुउपयोगी फल है । ई दुनियाके ऐसन पुरान फल सबमे से एक है जेकर जानकारी प्राचीनो समयमे मिस्रके फैरोह लोगके हलै । आजकल एकर पैदावार इरान, मध्य एशिया आउ अखनि भूमध्यसागरीय देश सबोमे होवे लगले हे । प्राचीन यूनानमे ई फल व्यापारिक दृष्टिसे अतना महत्वपूर्ण हलै कि एकर निर्यात पर रोक लगलै हलै । आज दुनियाके सबसे पुरान अञ्जीरके गाछ सिसलीके एकगो बगीचामे है ।

अञ्जीरके गाछ छोट आउ पर्णपाती (पतझड़ी) स्वभावके होब है । तुर्किस्तान आउ उत्तरी भारतके बीचके इलाका एकर उत्पत्ति स्थान मानल जा है । भूमध्यसागरीय तट वाला देश आउ उहाँके हवा-पानीमे ई बढ़ियासे फर-फुल है ।

यूनानके लोग एकरा कैरिया (एशिया माइनरके एकगो प्रदेश) से पयलथिन; एहीसे एकर जातिके नाम कैरिका पड़ गेलै । रोमवासी ई गाछके भविष्यके समृद्धिके निशानी मानके एकर आदर कर हलथिन । स्पेन, अल्जीरिया, इटली, तुर्की, पुर्तगाल आउ यूनानमे एकर खेती व्यापारिक स्तर पर कैल जा है ।

अञ्जीर नाशपातीके आकारके छोटसुन फल है । एकर अपन कौनो खास तेज गमक नै होब है । ई रसीला आउ गूदावाला फल है । एकर रङ्ग हल्का पीयर, गहरा सुनहरा या गहरा बैङ्गनी हो सक है । एकर छिलकाके रङ्गसे एकर स्वाद पर कौनो असर नै पड़ है । एकर स्वाद ई बात पर निर्भर कर है कि एकरा कने उपजाबल गेलै हे आउ ई केतना पकल है । एकरा छिलका, बीया आउ गूदाके साथे पूरा खाल जा सक है । जुकाम आउ फेफड़ाके बीमारीमे पाँचगो अञ्जीर पानीमे खौलाके छानके बिहान-साञ्झके पीवेके चाही । कफ (बलगम) निकलेवाला दमामे अञ्जीर खाएल फायदेमन्द होब है । एकरासे कफ बाहरे आ जा है । कच्चा अञ्जीरके कमराके तापमान पर रखके पकाएल जा सक है लेकिन ओकरामे प्राकृतिक स्वाद नै आव है ।

पौष्टिक तत्त्व

अञ्जीरके काँचा फल

अञ्जीर कैल्शियम, फाइबर आउ विटामिन ए, बि, सि से भरपूर होब है । एकगो अञ्जीरमे लगभग ३० कैलोरी होब है । एगो सुखल अञ्जीरमे ४९ कैलोरी, ०.५७९ ग्राम प्रोटीन, १२.४२ ग्राम कार्ब्स, २.३२ ग्राम फाइबर, ०.२२२ ग्राम कुल फैट, ०.०४४५ ग्राम सैचुरेटेड फैट, ०.१०६ ग्राम पॉलीअनसैचुरेटेड फैट, ०.०४९ ग्राम मोनोसैचुरेटेड फैट, २ मिग्रा सोडियम आउ विटामिन ए, बि, सि होब है ।