खोरठा भाषा

खोरठा
खोट्ठा पुरुबी मगही
𑂎𑂷𑂩𑂘𑂰
बोलेके  स्थान	झारखण्ड, बिहार
तिथि / काल	२०११ के जनगणना
क्षेत्र	उत्तरी छोटानागपुर प्रमण्डल, सन्थाल परगना
समुदाय	सादान
मातृभाषी बक्ता	लगभग ८० लाख
भाषापरिवार	हिन्द-यूरोपीय हिन्द-इरानीय हिन्द-आर्य पूरुबी समूह खोरठा
लिपि	देवनागरी, कैथी
राजभाषा मान्यता
नियन्त्रकसन्स्था	कौनो सङ्गठन न
भाषासङ्केत
आइएसओ ६३९-३	–

खोरठा (कैथी: 𑂎𑂷𑂩𑂘𑂰) वा बैकल्पिकरूपसे पूरुबी मगहीके रूपमे बर्गीकृत एगो भाषा हे जेकरा मगही भाषाके बोली मानल जाहे जे भारतीयराज्ज झारखण्डमे बोलल जाहे, मुख्यतः दू प्रमण्डल (उत्तरी छोटानागपुर आउ सन्थाल परगना) के १६ जिलामे । खोरठा सादानद्वारा मूलभाषाके रूपमे बोलल जाहे आउ आदिबासीद्वारा एगो सम्पर्कभाषाके रूपमे प्रयोग कैल जाहे । ई झारखण्डके सबसे अधिक बोलल जायेवाला भाषा हे ।

भौगोलिक बितरण

खोरठा झारखण्डके उत्तरी छोटानागपुर आउ सन्थाल परगना प्रमण्डलमे बोलल जाहे । १३ मण्डल हे हजारीबाग, कोडरमा, गिरिडीह, बोकारो, धनबाद, चतरा, रामगढ़, देवघर, दुमका, साहिबगञ्ज, पाकुड़, गोड्डा आउ जामताड़ा ।

बर्गीकरण

जॉर्ज् ग्रियर्सन् अपन भाषा सर्वेक्षणमे खोरठाके मगही भाषाके बोलीके रूपमे बर्गीकृत करलथिन ।

साहित्य

१९५० मे श्रीनिवास पानुरी कालीदासके मेघदूतं के खोरठामे अनुवाद कैलन । १९५६ मे ऊ दू कृति बालकिरण आउ दिव्यज्योति के रचना कैलन । भुवनेश्वर दत्ता शर्मा, श्रीनिवास पानुरी, विश्वनाथ दसौन्धी आउ विश्वनाथ नागर ऊ पहिल लोगमे से हलन जे खोरठामे साहित्यके आरम्भ कैलन । खोरठा भाषाके कुछ प्रमुख लेखक ए के झा, शिवनाथ प्रमाणिक, बी एन ओहदार हथ ।पहिला तुरी झारखण्डके लोग तक खोरठा भाषा आउ साहित्यक अन्तर्जालके माध्यमसे पहुँचावेके प्रयास सरकारी लाइब्रेरीके सन्स्थापक श्री मनञ्जय महतो' द्वारा कैल गेलहल । श्री मनञ्जय महतोके प्रयाससे खोरठा साहित्य पहिला तुरी अन्तर्जाल पर उपलब्ध भेल ।

नमूना वाक्यान्श

मानक मगही	खोरठा
रामुके लाज लग गेलै ।	रामुके लाज लगि गेले ।
अमितके साहस है/हे ।	अमितके साहस हे ।
हमरा लाज लगल ।	हम्मर लाज लगा ।
घोड़ाके खायेके दे ।	घोड़ाके खाबेके दे ।
बच्चवा अपन बहिनके नै मारको ।	बच्चाटा अप्पन बहिनके नै मारको ।
कलहे रामके बहिनके बियाह हौ ।	कलखिन रामके बहिनके बिहा हौ ।
छौड़ा एगो केला खालेलको ।	छौड़ाटा एकटा केला खालेलको ।
पच्चीस रुपैयाके/टकाके चीनी किनहु ।	पच्चीस टाकाके चीनी किनिअन।
अजय कलहे अपन मायके चिट्ठी लिखको ।	अजय कलखिन अप्पन माके चिट्ठी लिक्को।

एकरो देखहु

• मगही भाषा
• बिहारी भाषा
• भारतके भाषा
• हिन्द-आर्य भाषा
• मातृभाषा बक्ताके सङ्ख्याके अनुसार भाषाके सूची