ज्युरिख
ज्युरिक (जर्मन: Zürich त्सूरिख़्~त्सीरिख़्) स्विट्जरल्याण्डके सबसे बड़ नगर हे । साथे ई नगर स्विट्जरल्याण्डके रजधानियो हे । ई नगर स्विट्जरल्याण्डके व्यवसाय एवं संस्कृतिके मुख्य केन्द्र हे आउ एकरा दुनियाके ग्लोबल नगरमे से एक मानल जा हे । २००६ एवं २००७ मे भेल ढेर सर्वेक्षणके अनुसार एकरा निम्मन जीवन गुणवत्ता के नगर मानल गेलै हे ।
ई स्विट्सरलैण्डके ज्युरिक उपमण्डलके राजधानी तथा ई देशके सर्वप्रमुख औद्योगिक, व्यापारिक, शैल्पिक आउ बैङ्कके व्यापारके नगर हे । ई स्विट्जरल्याण्डके सबसे घना आउ रमणीक नगर हे । एकर अधिकांश भाग झीलके सुखाके बनावल गेलै हे । प्राचीन भाग अखनियो सघन हे किन्तु नया भागमे चौड़ा सड़क आउ सुन्दर भवन हे । लिम्मत नदी ई नगरके दु भागमे बाँट हे - लघु नगर एवं बृहत् नगर । ई दुनो भाग ११ सेतु द्वारा एक दोसरासे सम्बद्ध हे । झीलके समीप असङ्ख्य बल्ली आवासगृह हे ।
एहाँ ढेर प्राचीन भवन दर्शनीय हे जेकरामे सबसे सुन्दर ग्रास मून्स्टर या प्रापस्ती गिरजाघर लिम्मत नदीके दहिना किनारा पर हे । ई गिरजाघरके भीत पर २४ लौकिक धर्मनियम लिखल हे । एकर समीपे बालिकाके विद्यालय हे जने १२मा आउ १३मा शताब्दीके रोमन वास्तुकलाके अवशेष हे । लिम्मतके बामा किनारा पर ज्युरिकके दोसर बड़ गिरजाघर फ्राउ मूस्टर (आब्ती) १२मा शताब्दीके हे । सेण्ट पीटर गिरजाघर सबसे पुरान हे । एकर अतिरिक्त आउ ढेर गिरजाघर हे । सेण्ट्रल पुस्तकालयमे १९१६ ई मे सात लाख पुस्तक हलै जन्ने प्रसिद्ध समाजसुधारक तथा उपदेशक ज्विङ्गली, बुर्लिगर, लेडी जेन आउ शीलर आदिके पत्रो सुरक्षित हे । एहाँ प्राचीन अभिलेखके भण्डार हे आउ एहाँ वर्ष १८८५ मे स्थापित ज्विङ्गलीके प्रतिमा हे । नवीन भवनमे राष्ट्रिय सङ्ग्रहालय सबसे भव्य हे जेकरामे स्विट्जरल्याण्डके सभ काल एवं कलाके अद्भूत सङ्ग्रह हे । ज्युरिक शिक्षाके प्रसिद्ध केन्द्र हे । एहाँ विश्वविद्यालय, प्राविधिक संस्था आउ अन्य विद्यालय हे । एहाँके वानस्पतिक बाग संसारके प्रसिद्ध वानस्पतिक बागमे से एक हे । ई नगरमे रेशमी एवं सूती वस्त्र, मशीनके पुर्जा, मोमबत्ती, साबुन, सुर्ती, छीँटके कपड़ा, कागज आउ चमड़ाके वस्तु बनावेके उद्योग हे ।